Барилга Архитектур Корпораци нь судалгаа, үйлдвэрлэл, бизнес гэсэн үндсэн бүтцийн хүрээнд архитектур хот байгуулалт, барилгын бүтээцийн лаборатори, барилгын материалын судалгаа шинжилгээний нэгдсэн лабораториуд, барилгын материал, бүтээгдэхүүн баталгаажуулалтын алба, захиргаа санхүү аж ахуйн алба гэсэн үндсэн нэгжтэйгээр нийт 63 ажилтантайгаар үйл ажиллагаагаа явуулж байна.

   Корпораци БНМАУ-ын СнЗ-ийн 1964 оны 84 тоот тогтоолоор Барилгын эрдэм шинжилгээний нэгдсэн лаборатори нэртэйгээр анх байгуулагдан эдүүгээ хүртэл тасралтгүй 60 жил үйл ажиллагаагаа явуулж салбартаа хамгийн туршлагатай, тэргүүлэх, мэргэшсэн лаборатори болсон.

   Үндсэн үйл ажиллагаа нь барилгын салбарын шинжлэх ухаан, эрдэм шинжилгээ, сорилт шинжилгээ, тохирлын үнэлгээ, баталгаажуулалт болно.

   Барилга архитектур корпорацийн Сорилтын лаборатори, Бүтээгдэхүүн баталгаажуулалтын алба нь итгэмжлэлийн шалгуур үзүүлэлтэд нийцэж Стандартчилал, хэмжилзүйн газраас 1997, 2000, 2003, 2006, 2009, 2013, 2016, 2020, 2024 онуудад буюу 9 дахь удаагаа тасралтгүй ИТГЭМЖЛЭГДСЭН болно.

   Корпорацийн итгэмжлэгдсэн сорилтын лаборатори нь ОХУ, Унгар, Герман, Польш, Итали, Англи, Щвейцарь, Солонгос, БНХАУ-ын тоног төхөөрөмж, багаж хэрэгслээр тоноглогдсон, байгууллагын ажиллагсдын 80 гаруй хувь нь инженер техникийн мэргэжлийн бөгөөд эрдэм шинжилгээний ажилтан, түүний дотроос шинжлэх ухааны  доктор -1 /Sc.D/, боловсролын доктор -1 /Ph.D/ монгол улсын зөвлөх архитектур -1,  монгол улсын зөвлөх инженер -3,  магистр инженер -7 ажиллаж байна. Ажиллагсадын 50 гаруй хувь нь 10-40 жил ажилласан дадлага туршлагатай ажилтнууд байдаг.

   Корпораци нь барилгын салбарт шинжлэх ухаан, үйлдвэрлэлийн харилцан уялдаатай тогтолцоо бий болгоход тодорхой үүрэг гүйцэтгэж, ялангуяа барилгын материалын үйлдвэрлэлийн хөгжилд бодитой хувь нэмэр оруулжээ.